Codbixinta Doorashadda Somaliland Oo La Filayo In Goor Dhaw La Soo Gebagabeeyo

Hargaysa (SDWO): Codbixinta doorashadda madaxtooyadda Somaliland ayaa  la filayaa in ay goor dhaw soo geba gebawdo, isla markaana la xidhi doono goobaha codaynta sida  komishanka doorahsooyinku u qorsheeyeen.

Gudiga doorashadda Somaliland oo goor dhawayd  shir  jaraa’id ku qabtay xaruntoodda Hargaysa ayaa sheegay in sida qorshuhu yahay 6 makhribnimo la xidho doono.

Hase  yeeshee goobaha qaarkood haddii ay jiraan  dad safafka ku jiraa in wakhtiga loo kordhin doono.

Sidoo kale baraha bulshadu ku xidhiidho ee internet-ka sida Facebook, Twitter, emo  iyo qaar kale ayaa la xidhi doonaa 6 fiidnimo ilaa inta lagu dhawaaqayo natiijadda doorashadda, sida hore u shaaciyeen gudiga doorashadu.

Taasoo ay  ku macneeyeen mid looga dan leeyahay si aanay dadweynuhu baraha bulshadda u soo dhigin ama ugu qorin natiijooyin been abuur ah iyo warar  aan xaqiiqo ah oo  la xidhiidha natiijadda doorashadda.

Si aanay khal-khal ugu keenin natiijadda doorashadda ilaa inta gudiga doorashadu ku dhawaaqayaan, oo qaadan karta 3 ilaa 4 maalmood.

Dhinaca kale guud ahaanba codbixinta doorashadda jamhuuriyadda Somaliland ayaa la soo sheegayaa in gebi ahaanba ay dalkoo dhan si weyn uga dhacday, isla markaana aanay jirin wax dhibaato ah oo ilaa ahdda la soo sheegayo.

Tirada codbixiyayaasha la diiwaangeliyay waxay gaadhaysaa 704,089 (todoba boqol iyo afar kun iyo siddeetan iyo sagaal qof).

Goobaha codeynta ee Somaliland ayaa  komishanku ku sheegeen   1,642, oo la sheegay in ay yihiin laga soo bilaabo min Lawyacaddo ilaa Taleex. Inkastoo degmooyinka Dhahar iyo Laasqoray  oo ka tirsan  gobolka Sanaag  aanay hore uga dhicin diiwaangelintu.

Tirada codbixiyaasha rasmiga  ah ee  gobollada jamhuuriyadda  Somaliland  hore isaga diiwaanegliyay lana filayo in ay maanta codeeyaan, waxay kala yihiin sidan:

Maroodijeex: 249,229

Togdheer: 147,440

Awdal: 102,571

Sanaag: 80,334

Sool: 63,698

Saaxil: 60,817

SDWO/Hargeisa Office