Heestan oo xaqiiqadii ka mid ah kuwa fara ku tiriska ah ee murti ahaan iyo maqal ahaanba da’yartu ay aadka u jecel yihiin ayay ku odhanaysaa walaasheed “walaal yaa kuu soo duubay heestan”, iyaduna waxay ku odhanaysaa “waxaan ka soo qaatay Hibo, dabadeedna heestan oo kaliya maahee waxa ku jira dhawr heesood oo aan ka helo, sidaa darteedbaan u soo qaatay”, walaasheeda yari intay aad u qososho ayay odhanaysaa “maanaan garan in jacayl ku hayo”. Markay ka tagtay tii yarayd ayay Ramli si aada u fekeraysaa iyada oo ku fekeraysa inaan Illaahay dhaafin Nuux oo uu ka dhigo ninkeeda, waxaanay niyaysatay iyada oo oori u noqotay, inkasta oo aanuu qofna ogayn siday wax u dhacayaan iyo wax iman doona haddana marnaba kamay nixin oo dhinaca xumaanta waxay kamay eegin waxayse mar walba ka eegaysay dhanka wanaaga, hore sidaynu u aragnay waa qof daacad ah oo wixii lagu yidhaah u aaminta sida loogu sheego, mana aha dadka sii daba gala ama qodqoda qofka wax u sheega. 

Maadaama ay maanta ku jiraan guri hantiya oon dib looga rari karin waxay gashay oo ay tagtay goobtii waxbarashada, maalintii ku xigtay maalintaa ayaa waxa xafiiska uu ka shaqeeyo Nuux ka tagtay shaqadii gabadh adeegto ahayd oo shaaha karintiisa iyo waxyaabaha waraaqo qaadida ku qornayd, isaguna waa intuu doonayay wuu soo galiyay shaqada sidiibay Ramli kaga mid noqotay shaqaalaha Hay’adda, halkaa waxa ka daboolmay quutal daruurigii markii hore madmadowgu ku jiray, gaadhibaa qaada subixii Ramla iyada iyo shaqaale kale oo badan, waxay dhammaantood la yaabeen gobanimada inanta yaree haddana da’deedu aadka u hoosayso, waxaanay isku raaceen in cid lagu doorsadaa aanay jirin, markii shaqaalihii mid waliba midkii kale uu ula yimid sheekadii uu is lahaa u sheeg oo kan kalena uu rabay inuu isna u sheego ayaa codkii loo qaaday waxay noqotay qofkii loogu kalsoonida badnaa shaqaalaha, ma baxdo ilaa qofka ugu dambeeya shaqaaluhu uu baxo waxaan hawsheeda ahayna ma qabato, markii dambe ayaa Saado oo ka mid ah shaqaalaha sare ee xafiisku waxay siisay fure xafiis oo uu yaalo computer waxaanay u sheegtay in gelinka hore lagu barayo computer-ka ka dambena English-ta, Ramli iyadoo horeba wax u soo dhigatay ayaa haddana arrintani waxay noqotay mid kor u qaada niyadeeda oo si qurux badan ay u soo dhawayso, Nuuxna mudada xafiiska lagu jiro isma yaqaanaan isaga iyo gacalisadiisu, waxaanuu ula dhaqmaa sida shaqaalaha kale uu ula dhaqmo, si aan loo dareemin oo aan loo ogaan waxa ka dhexeeya labadooda,

Maalintii dambe ayay dhammaysay saddex bilood kadib computer-kii iyo qoristii iyo akhriska afka Soomaaliga, iyada oo si fiican isugu filan ayaa waxa meesha ka tagtay gabadh ka shaqaynaysay iyaduna qayb ka mid ah xafiisyada oo xoghayn ahayd, dabeetana shaqaalihii waxay isku raaceen in laga dhigo xoghayn Ramla, Ramla oo wakhtigan isbiidhka garaaca computer-ka waxaad moodaa in lasoo raaciyay oo ay weligeedba garaaci jirtay, dalacaada ay dalacday waxay ku heshay in loo kordhiyo mushaharka iyo in ay noqoto qof soo dhex gashay dabaqadii dhexe ee shaqaalaha, Nuux wuxuu la hadlaa markay guriga tagaan, weli kulama dhex hadlo shaqada dhexdeeda oo wuxuu diidaa in la arko iyaga oo wada taagan ama wada sheekaysanaya, arrintii Nuux waxa uu ku guulaystay in ay Ramli reerkoodii iyo iyaduba ay isku filnaansho gaadhaan, waxaanay bilowday inay dhisto jagada bannaan inta ka dhiman oo ah laba qol, waxoogaa lacagana waxa ugu kordhiyay Nuux, mar walba wuxuu ku farxaa marka laga yimaado jacaylka sida ay u halgamayso inantan yari, waxa lasoo gaadhay wakhtigii ay iman lahaayeen waalidkii dhalay Nuux hooyadii iyo aabihii oo wada gabadh kale oo ay la rabeen inuu guursado, gelinkii hore ee maalintii Isniintii ayay kasoo degeen Madaarka Hargeysa, wuu ka hortagay waanuu soo qaaday, wuxuu keenay guriga, Nuux aabihii maaha nin u bartay in hadal lagu celiyo ee wuxuu ahaa nin taladiisa mooyaane tallo kale aanay socon, intii Nuux iskuulka ku jirayna waxa uu waalidku ugu taliyo si wanaagsan ayuu u qaadan jiray, dhibaataduse waxay maanta taagan tahay siduu u yeeli doonaa inuu guursado gabadh aan Ramla ahayn iyaguse sideebay uga yeeli doonaan in uu wiilkoodu wixii uu doono hortooda ku sameeyo, arrintii markii ay muddo joogeen reerkii ayaa waxay maqleen xam-xam yar dabadeedna Nuux aabihii intuu si toosa ugu yeedhay ayuu ku yidhi “wax kale umaan iman waxaan u imid inaan kuu dhiso, markaad aroosatana aanu iska noqono, waxaananu kula joogaynaa laba bilood, inantana aniga ayaa kuu soo dooray waana qof nolosha kula qaybsan karta oo dhinaceeda wax ka qabanaysa markaa aabo waxaan kaa codsanayaa inaad hadalkayga qaadato oo aanad igu soo celinin hadal”, iyaga oo halkaa maraya hooyadii iyaduna soo gashay qolkii fadhiga, waxay u sheegtay wiilkeeda in ay damacsan tahay sida aad aabihii damcay lana rabto gabadha ay wadaan, markaa waxay ugu daraysaa iyadu soo fasax qaado oo kaalay hada aanu guda galno arrimihii guurka. Nuux tallaa ku caddaatay hase ahaatee waxa uu ku yidhi ama kuu badheedhay in uu xaqiiqda jirta u sheego hooyadii iyo aabihiiba, waxaanuu si caddaana u yidhi “aabo iyo hooyo anigoo og xaqa aad igu leedihiin, aniga oo og inaad tihiin kuwii ka dambeeyay noloshayda, aniga oo aan marnaba hilmaansanayn meesha aad noloshayda kaga jirtaan haddana suuragal iimay noqon inaan idinka qaato arrinka, wixii kale oo dhan diyaar ayaan u ahaanayaa laakiin waalidkayoow waxaan aniguna diyaarsaday gabadh aan guursado oon muddo laba sanadood ah aan la sheekaysanayay meel aan kaga tagana aanay wakhtigan taagnayn, haddaan imika idinka yeelo gabadhan inaan guursado marnaba ma haynayo laba bilood, markaa maxaad isla caddibaysaan inantana u soo caddibteen, waxay ahayd inaad ii soo sheegtaan intii aydaan iman in gabadhi idinla socoto”, hadalka iyo guntiisaba laabi laba qof uma qaybsanto, odaygii iyo islaantii intay sidaa isku eegeen ayay ku yidhaahdeen “waa goor dambe iska seexo oo waxaanu kaa doonaynaa inaad barito war wanaagsan aad na siiso si aanu ugu go’aan qaadano”. 

Waanay ka kaceen halkii ay fadhiyeen iyaga oo aan faraxsanayn, Nuux wuxuu telefoon u dirayaa Ramla una sheegayaa arrimuhu siday u dhacayaan iyo xaalku halkuu marayo, Ramli aadbay uga xuntahay arrinta la soo deristay mattaankeedii, wax ay ka qaban karto arrinkana ma jiro, waxay ku odhanaysaa “walaal calafku waa halkiisa, caashaquna waa meeshiisa, haddii aynu calaf isku leenahay cid ina kala kaxaynaysaa ma jirto, haddaynaan isku lahayna cid isku keen dhajin kartaa ma jirto, aniguse midbaan kuu sheegayaa xattaa hadaad guursato gabadhan waxaan ahay gabadhaadii, mar hore ayaan go’aansaday, dhibaato kasta oo inaga hor timaada in aanan kaligaa kugu eegin ee aan kula qabto intii karaankayga ah, maanta kalsooni ayaan dhinacaygaa kaa siinayaa aad ayaan kuu jeclahay la’aantaana noloshayda iyo ta waalidkayba iyo ta qoyskaygaba waa baaba’, maxaa yeelay tiirka ama udub-dhexaadka raaskayagu wuxuu ahaa adiga, maanaan lahayn aabo, lamanaan dhalan wiilal manay jirin cid wax noo qabatay, wakhtigii noloshu nagu adkayd intaa waxa dheer way yartahay Nuuxoow inanta hesha adiga oo kale markaa walaal haddii ay kugu khasbaan waalidku in aad yeesho tooda haka baqanin in aan anigu ku diido, mar walba diyaarbaan kuu ahay iskana ilaali cadhada badan, werwerka iyo madax xanuunka una arag wax aan waxba kaa qaadayn hadalada, 

Nuux waxay ku noqotay arrin aad iyo aad u adag oo uu u qaadan waayay waayo wuxuu is lahaa markaad gabadh u sheegto way boodi doontaa oo waxay odhan doontaa miyaad igu dul day-dayanaysay hase ahaatee markuu ogaaday in wuxuba ay yihiin wax ay raali ka tahay Ramli ayaa waxa u qaboobaya nafsada, waxaanuu galayaa nafis muddo dheer, waagu markuu baryo shaqadiisii ayuu iska qabtay, shaqadii ayay iskugu yimaadeen maalintaas oo ahayd maalintii uu ugu eegmada badnaa ee uu daawaday Ramla, labadooda xafiis waxa u dhexeeya daaqad marka aanay shaqada hayn waxa iska fadhiisataa barandaha xafiiskeeda, halkaasoo ku beegan daaqada Nuux, Ramli wakhtigan waxay noqotay hablaha loo dirayo waxbarashada, kuwaasoo afar ka mid ah oo ay ku jirto la rabo inay tagaan Nairobi si ay u soo bartaan Maamulka iyo Maareynta, Ramli waa qof maskax fiican English-ka iyo Secteriat-ka si fiican ayay u taqaana oo waxa lagu baray xarunta dhexdeeda, waxa kale oo intaa u dheer inay tahay inan aad u edab badan, waxay sidaa ahaataba waxa la soo dhejiyay dadkii u baxayay safarka dibadeed marka hore waxa ay maqnaanayeen afar bilood iyadoo mar labaadkana noqon doonta sagaal bilood, afar cisho kadib Ramli waxay joogtaa garoonka Diyaaradaha ee Hargeysa iyada oo ay mattaankeeda si weyn isaga war qabaan, Ramli kuma faraxsana tagitaanka waayo waxay ogtahay waayaha jacayl, welbahaarka iyo werwerka kusii badanaya mattaankeeda, muran kuma jiro inay wax badani iska bedeli doonaan labadoodaba noloshooda haddana wakhti kasta waxay ku ballameen oo ay ku xidheedhaan khadka Internet-ka iyo telefoonka xafiiska. Ramla markii la geeyay halkay ku qaadanaysay casharada iyo Huteelkii ay degganaan lahayd ayaa waxay u baahatay in qolka ay deggan tahay ama Huteelka laga heli karo Internet, waxaad moodaa in waddamada bariga Africa ay Jamhuuriyaddan Somaliland kaga horaysay facilities-ka ama qalabka isgaadhsiinta oo ay iyaga ku adagtahay sida loo helaa. 

Nuux saacadiiba wuxuu soo diraa afar ilaa shan waraaqood laakiin Ramla waxa laga yaabaa markay laba cisho maqnaato inay maalinta saddexaad ama afraad, maalintii dambe ayuu u diray warqad ay ku qoran tahay heesta ay qaado Sahra Axmed oo aad moodo in iyaga ay tilmaamayso waana tan: