Xaashi Muse oo ka jawaabay eedeyntii Morgan

SNN Hargeysa - Xaashi Muuse oo ka mid ahaa raggii uu Gacan ku dhiigle moorgan ku sheegay waraysigii ay Jamhuuriya la yeelatay inuu ka mid ahaa raggii u dhashay Somaliland ee la waday xasuuqa, ayaa markii u horaysay xalay jawaab ka bixiyay hadalkaa General Moorgan. War qoraala oo uu soo saaray Xaashi Muuse oo saxaafada loogu tala galay waxa uu u qornaa sidan, waxa kale oo uu Xaashi saxaafada usoo gudbiyay warqad sir culus ah oo uu ku sheegay in taliyihii nabad sugida ee Soomaaliyeed uu ku eedaynayay Xaashi Muuse inuu ahaa nin xidhiidh la leh SNM.

   Qoraalkaasina waxa uu u qornaa sidan:

   Waxaan ilaa shalay arkayey sheekooyin suuqa mar marayey warar la leeyahay nin baa laga soo weriyey oo dad halkan Somaliland jooga wax buu ku yidh yidhi. Markaa ninkaa la sheegayo ee Moorgan la yidhaahdo, ninkaasi annagu waxaanu u naqaanaa Cabdi Bille, ninkii Hargeysa orodka kaga baxay buu ahaa ninkii dhibaatooyinka badan dadka u geystayna wuu ahaa, markaa nin aniga iska daayoo cid kale oo Reer Somaliland ahi ay xidhiidh yeelan karaan ma ahayn, annagana shaqadayadu way kala duwanayd oo way kala fogayd, midba se cuqdad kama qabo haddii ninku dadka is marmariyo.

    Waxaa imika jirta Somaliland halkay marayso waad ogtihiin way dhaqaaqday, dee cadowgu albaabadii dibadda ee uu garaacayey way ka soo xidhantay, imika waxaad moodaa in ay si xeeladaysan uga soo horjeesteen Somaliland oo ay doonayaan Somaliland gudaheeda in ay waxoogaa arbush ah ka sameeyaan taa qudheedana in aad looga feejignaado saxaafadda iyo cid kastaana ka feejignaato oo aanu cadowgu ka faaiidaysan dadkeena dhexdiisa oo aanu tashuush ku abuurin, waxaaba dhici karta in masuuliyiin kale oo naga waaweyn sidaas oo kale ku soo baxdo.

    Intaa ka dib waxa la yidhaahdaa Adhiga marka la gawraco ee mindida laga qaado wuu raftaa, rafashadaa uu raftana waxaa ka duulduula dhiig dabadeedna dhiiggaasi wuxuu wasakheeyaa dadka hareeraha ka jooga markaa ninkaa innaga gawraca innoogu xukuman ayaa rafanaya. Imika waxaa laga yaabaa in uu cid uun dhiiggiisa ku saydhsaydhayo, sidaa awgeed baanay ahayn in arrintaa la sii weyneeyo aniga iyo cid kale toona. Marka ay aad u weynayso ee ay buunbuuniso saxaafadduna waxa ay leedahay asluub u gaar ah oo ay iyadu ilaaliso oo ay ku jirto sharafteeda iyo sharafta qaranimadeeduba.

   Xaqiiqdii Jamhuuriya waxaan u haystaa in ay qayb weyn oo aan la hilmaami karin ka soo qaadatay dhismaha dalkan Somaliland markaa sumcadeeda gudaha iyo dibaddaba wax weyn bay u geysatay, waana la khaldami karaa oo bashar ayeynu nahay, aniguna ma jecli in Jamhuuriya ceebi ku timaado, markaa waxay ila tahay in ay iyaguna aad u foojignaadaan.

   Waxaan hadalkayga kaga bixi lahaa oo aan odhan lahaa waxaa la yidhi Waxaa la yidhi ninkii hebel wuu ku caayayey markaasuu ninkii yidhi muxuu I caayaa col baanu nahaye nin aanu col nahay wixii uu yidhaahdaa waa waxba laaan.

   Odaygaa la sheegayana [Cabdi Waraabe] wuxuu ahaa oday Soomaaliyeed oo waddanka wax badan u qaban jiray imikana u qabta. Ninka kale ee kornaylka ah [Ina Cumar-ku-joog] intii waxaasi dhacayeen oo dhan waddanka ma joogin oo wuxuu joogay kolna Xamar kolna dibadda ayuu ku maqnaa, markaa waxa weeyaan nin fule ah iyo hadalkii, arrintaasna waxa aan u arkaa mid ay fulaynimo ka yeedhsiisay. Nina saaxiibkii ma xidho mana mastaafuriyo xilkana kama xayuubiyo.
   

SOMALILAND DEMOCRACY WATCH ORGANISTION - NEWS PAGE