Xukuumadu way ku guuldaraysatay in ay sugto nabadgelyada dadka ajaanibka ee u martida ah,  ka dib dilkii ka dhacay magaalada Boorame oo ay ahayd in ay ku baraarugto. 

SDWO – London 23^rd Oct 03 (Somaliland Democracy Watch Organisation) Waxa aan aad uga xunahay isla markaasna canbaaraynaynaa falal denbiyeedka ka dhanka ah dadka ajaanibaka ah ee naftooda u huray hormarka iyo wax u qabadka Jamhuuriyada Somaliland.  Waxa mid aad looga xumaado ah dilkii waxashnimada ahayd ee loo geystay Maamulahii dugsiga Sheekh iyo Afadiisii ee u dhashay dalka ingriiska iyo gabadhii talyaaniyada ahayd ee Boorama lagu dilay, gabadhaas oo ka hirgilsay dhakhtarka daaweeynta cudurka qaaxada iyo dugsigii caruurta dhegoolayaasha. 

Marka ugu horeysaba waxaan halkan tacsi uga diraynaa ehelkii iyo qaraabadii ay ka geeriyoodeen iyo dhamaa shacbi weynaha Somaliland oo dareemi doona waxqabadkoodii. 

Falalka noocan oo kale ah oo aan hore dalka uga dhici jirin waxa ay ku salaysantahay arimo siyaasadeed (Political Assassinations) oo lagu mijo xaabinayo jiritaanka qaranimada Somaliland, horumarka iyo nabadgelyada ka jirta dalka, horumakaas oo soo jiitay indhaha caalmaka, mararka qaarkoodna lagu tilmaami jiray meelaha ugu nabdoon geeska afrika. 

Somaliland waxa ku waajib ah in heegan loo ahaado la dagaalanka falalkan khaarijiska ah ee ka bilaabmay dalka una eg kuwo laga soo abaabulay dalka dibadiisa, kana danbeeyaan dadka ay boogta ku noqotay jiritaanka Somaliland kuwaas oo isugu jira qaar  u dhashay dalka  iyo kuwo shisheeyeba ah.

Wasaarada Arimaha Gudaha waxa waajibkeedu ahaa ka dib dilkii Boorma ka dhacay in dhamaan la sugo nabad gelyada dadka ajaanibka ah ee dalka ku sugan meel wal oo ay joogaanba, waxa hore loo yidhi mar idagge alle ha daggo, laba i dagge se anaa isku daggay.  Arintaas ceebteedna waxa iska leh wasaarada arimaha gudaha iyo Taliyaha Ciidanka Booliska oo ka masuula nabad gelyada dalka gudahiisa, waxaana nasiib daro noqotay in aanay sugin nabadgelyada dadkaas la laayey ka dib dilkii Boorme jawaabteedna looga fadhiyo. 

Waxa jirtay ninkii hore ee ajaanibka ahaa ee Switzerland ka ahaa ee sanadkan horaantiisii  lagu dilay Hargeysa Star hotel hortiisa, ninkaas oo 3 nin loo hayey dilkiisa oo imika uun lagu baraarugay in maxkamad la horkeeno wax warana aan mudadaas  xukuumadu ka soo saarin dilkiisii.   Hadii aan  si degdega ah wax looga qaban  afartan kiis ee dilka ajaanibka ah, waxa sii badandoonta dilka ajaanibka loo geeysanayo si dalka looga saaro Haayadaha, sidaas darteedna Somaliland ay  ku weydo waxqabadka ay hayadahu ka wadaan dalka oo dhan, aduunkana loo tuso in aan Somaliland Muqdisho waxba kaga duwanayn, taasi oo ah ajandahooga ugu weyn ee cadowga dalka gudahiisa iyo dibadiisaba ku sugan. 

Sidoo kale arintan waxa ay daba socotaa iyadii oo hada uu caalamku indho gaara ku eegayey Somaliland kuna qanacsanaayeen nidaamka iyo kala danbaynta ay Somaliland gaadhay, doodo badanina socdeen sidii aqoonsi buuxa loo siin lahaa Somaliland, maadaama ay buuxisay shuruudaha uu leeyahay qaran jiraa. 

Gebogebadii Xukuumada waxa looga baahanyahay in arimahaas dilalka ah ay xil weyn iska saarto kolbana waxii ka soo kordha wax ka qabadkooda  shacabkeena iyo aduunkaba loo soo bandhigo in lagu hawlanyahay soo qabashada denbiilayaashaas.    Marlabaadna waxaan xukuumada u soo jeedinaynaa in ay si buuxda u damaanad qaado amaanka dadka ajaanibka ah ee hawlaha ka wada dalka. 

Allaa Mahad Leh        -  Long Live Somaliland 

Guled Cabdi Maxamed          –   Gudoomiyaha Ururka

Mukhtar Ahmed Sh. Adan     –  Gudoomiye ku Xigeen

Axmed Maxamed Yusuf       –  Afhayeenka Ururka

Foosi Xuseen Rooble          -   Wakiilka ururka ee Pakistan

Kaysar Mahad Cumar         –  Wakiilka ururka ee Hargeysa