DIMOQRAADIYADII XAGAY MARTAY?

 (Press Release-Somaliland Democracy Watch Organisation UK(SDWO) -26^th October 2001).  Wuxuu wakhtigu soo gurguurtaba soo gebi dhacleeyaba waxa hadda la guda galay wakhtigii tartanka hanaanka xisbiyada badan ee lagu tartami lahaa hogaanka dalka shanta sanadood ee soo socda haddii eebe yidhaahdo.

Ilaa hadda sida la wada ogsoonyahay waxa si sharci ah isku diiwaan geliyay 7 xisbi. Xisbiyadan oo dhamaantood bilaabay u ololaynta iyo kasbashada shacbiweynaha Somaliland.  Hadaba dhamaan waxa aan u soo jeedinaynaa si loo helo doorasho xalaal ah oo qof waliba ku qanacsan yahay in la dhaawro hananka dimoqraadiyada iyo dastuurka dalka.

  Waxa mid aad looga xumaado ah meel ku dhacweyna ku ah habka loolanka xisbiyada ee dimoqraadiyada iyo dastuurka dalkaba, wixii foosha xumaa ee dhowaan ka dhacay degmada cusub ee daarasalaam ee ururka Udub iyo xubno dowladda ka tirsani ku hor istaageen Xisbiga UCID in uu ka qayb galo qudbadahii halkaas ka socday oo isugu jiray furitaanka degmada cusub iyo loolan siyaasadeed oo ku wajahan tartanka dooroshooyinka  guud, xafladaasna waxa lagu soo gebogebeeyay UCID oo aan wax hadal ah loo ogolaan in ay ka jeediyaan xafladaas.  Dhanwal oo la eegaba arinta halkaas ka dhacday waxay ku tusaysaa sida ururka UDUB uu ugu tuntay habka dimoqraadiyada, xoriyada afkaar dhiibashada iyo Dastuurka dalkaba, wakhtigan xaadkirka ahna looma baahna taas oo kele oo hadii ururadu aanay u sinaan ka qayb galaka tartanaka dooroshooyinka wax natiijo fiican ah oo ka soo bixi doonaa ma jiri doonto oo la odhan karo dooroshooyinkii waxay u dhaceen si dimoqraadi ah.

Waxa iyana meel ka dhacweyn ahayd markii dhowaan gudoomiyaha degmada salaxley waraysi uu siiyey Jahmuuriya uu ku sheegay in isaga iyo ururka UDUB ay isla af garteen in uu UDUB noqdo ururka qudha ee xafiis ka furan kara degmada Salaxley, tani oo noqotay mid aad looga yaabay kana soo horjeeda hanaanka dimoqraadiyada ee aan rabno in aan wax ku doorano,  arintan oo kalana waxa ay sababi kartaa khatarteedna leedahay in nin waliba degmadiisa xidho oo uu yidhaah ururkaan u ogalaado oo qudha ayaa iman kara tanina ay dib inoogu celinayso habkii qabiilka ee aan rabnay in aan ka guurno.                       

Waxa aan marlabaad u soo jeedinaynaa xukuumadda in ay ururada u ogalaato in ay u hawl galaan sida uu UDUB u hawlgelayo oo kale oo kolba meel aan laga soo celin ama loo diidin in ay idinla tartamaan oo ay ka qudbadeeyaan meelaha aad ka qudbadaynaysaan dadkana u soo bandhigaan  balan qaadayadooda doorashada, deedna dadku kala doortaan cida ay taageerayaan iyo cida kale, se sida ka dhacday Daarasalaam aan dadka lagu qasbin in urur qudha uun ay dhegaystaan ka kalana loo diido in ay hadalkooda maqlaan, tani oo meel ka dhac iyo cabudhin  ku ah xaquuqaha muwaadiniinta ee cabirida figradahooda iyo taageerida cidii ay tuhmaan in ay Somaliland wax ku soo kordhin karaan.   Haddii kale oo dimoqraadiyada iyo hanaanka tartanka xisbiyada la dhaawri waayo ma filayno in wax doorasho ah oo dadku ku kalsoon yahay ka dhici doonto dalka guud ahaantiiba. Waxaan ku soo gebogebeeynaynaa ha la ilaasho dastuurka dalka. qodobkiisa 10aad ee sinaanta muwaadiniinta, xubintiisa 1 aad oo odhanaysa  (Muwaadiniinta Somaliland iyadoon lagu kala saarayn, midabka, qabiilka, dhalashada, luqada, lab iyo dhedig, hantida, mudnaanta, afkaarta iwm, waxay sharciga hortiisa ku leeyihiin xuquuq iyo waajibaad siman).

Guled Cabdi sheekhaash     - Gudoomiye

Mukhtar Axmed Sh. Adan  – Gudoomiye ku xigeen

Axmed Maxamed Yusuf      -  Afhayeen

                                                                            www.somaliland-democracy-watch.co.uk