www.somaliland-democracy-watch.co.uk                            To Promote Democracy in Somaliland

Xukuumadda iyo Xisbiyada Somaliland ba waa in aay dhaawraan nidaamka Dimoqraadiyada

(SDWO 13/04/01 - London)Waxa mid aad loogu farxo ah in maanta Somaliland ay ka gudubtay habkii qabaa,ilka ee maamulka dalka lagu dheeli tiri jiray ama wax lagu qaybsan jiray loona gudbay nidaamka dimoqraadiyada iyo hanaanka xisbiyo badan oo siyaasi ah, waana mid illaahay loogu mahad naqo horumarkaas aynu gaadhnay.   Hadaba waxa loo baahanyahay in la ogaado lagana feejignaado maadaama oo aynu xaalad qabiil ka gudbayno una gudbayno waa cusub, dimoqraadiyad iyo hanaanka xibiyada badan si aanay inooga lumin horumarka aynu gaadhnay iyo ka aan higsanaynaba.

 Marka horaba ururkayagani wuxuu soo dhowaynaynaa dhamaan xisbiyada siyaasiga ah ee lagaga dhawaaqay gudaha Somaliland iyo Dibadiisaba,  Sida Xisbiga Illeyska Somaliland oo lagaga dhawaaqay London, Xisbiga  Badbaadinta Somaliland, Xisbiga Islaamiga Somaliland iyo Xisbiga dadka Somaliland oo lagaga dhawaaqay Somaliland iyo Xisbigii SNM ee horey u jirayba.

 Hadaba xisibiyadaas aan kor ku soo sheegnay sida aynu wada ogsoonahay ma jiro mid si sharci ah uga diiwaan gashan  maxkamada sare ee dalka ama soo maray habkii iyo nidaamkii loo dhigay in lagu aqoonsado urur siyaasi ah.  Haddaba waxaanu kula talinaynaa in ay isa soo diiwaan geliyaan soona maraan nidaamka Dastuuriga ah ee qaranka u yaal si  loogu aqonsado urur siyaasi ah haawlahooda si rasmi ah ugu guda geli karaan.   Haddii aay inaga dhabtahay dhamaanteen horumarinta, wanaajinta iyo hirgelinta qaranimada Somaliland markaas waxa inugu waajib ah haddii ay tahay xukuumada ama ururada siyaasiga ah in la iska daayo isku muuqashada, isla ficiltanka iyo ku jiq siida oo shacbigeena soo daashatay kana koray maanta loona  soo wadda jeesto sidii iyo habkii aynu dalkeena iyo dadkeena ugu dejin lahayn siyaasad caafimaad qabta oo ina dhiqi karta, taasoo aynu ku gaadhi karno hurmar dhan walba leh.

 Xukuumaddana waxaan u soo jeedinaynaa in aay biloowdo diiwaan gelinta ururada cusub una fududayso soona dhoweyso cidii buuuxisa shuruudaha dastuuriga ah ee qaranku leeyahay maadama oo mudo 10 bilood oo qudha ahi inaga xigto xiligii  kala guurka iyo doorashooyinka guud., xaquuqdoodana la siiyo ururada siyaasiga ah lagana daayo cabudhinta iyo cago juglaynta loona ogalaado in ay bilaabaan baahinta ku wajahan nidaamkooda siyaasadeed ee waxqabadka dalka.

 Xisbiyada siyaasiyiinta ahna waxaanu marka hore kula talinaynaa in dhismaha ururadooda ku saleeyaan fikir, mabda iyo siyaasad ka fayoow ficiltan, qabyaalad, ku jiq sii, ku xumee iyo siyaasadahii ina soo daashadey shacbiguna ka koray, iyo in aay ka fiirsadaan talaabooyink ay qaadayaan iyo warsaxaafadeedyada  ay bixinayaan, ogsoonaataana inta aad is leedahiin la ficiltama xukuumada hada jirta ama ku xumeeya in aad wiiqaysaan horumarka, xasiloonida iyo qarinimadda Somaliland ba,  

Sida ku cad warmurityeedkii u danbeeyay ee uu soo saaray ururka Islaamiga Somaliland ee uu ku  dhaleeceeynyey  xukuumaddu in ay cutubyo ciidnka qaranka ka tirsan  ay eriday, tani mid waa loo baahan yahay in laga hadlo  sidase looga hadlayo waa in la eegaa waxay keeni karto iyo wadada loo marayaba,  waxaanu qabaa qoraalkaasi iyo kuwa la midka ahba ee xisibiyadan cusub qaarkood caadeeysteen in dhibaato mooyee aanay  wanaag soo kordhin karayn, sababtoo ah waxa aay keeni karaan kacdoono qaranka dhexdiisa  xaslooni laa,ana ka abuuri kara.

 Hadaba marka loolan siyaasadeed la gelayo waxa loo baahan yahay in aad dadka tustaan waxa aad kaga duwan tahiin nidaamka hada jira iyo waxa aad qaban kartaan iyo habkii aad u qaban lahaydeen, laakiin dhaleecayn loo soo jeediyo qofkale ama koox kale ma filayno in aay tahay nidaam siyaasadeed oo la isku soo sharxi karo bulshadana lagu hanan karo.

 Markaas dhamaan xisbiyada hadda jira iyo kuwa soo bixi doonaba iyo Xukuumaddaba waxa haboon in nidaamka dimoqraadiyada la dhaawro oo aan lugu xadgudibin lanana yimaado dhaawrsanaaan iyo weji cad oo siyaasadeed kana turumaya horumarka qaranimada  Somaliland.