“Waa in loo hawlgalaa
sidii looga dhaadhicin lahaa Qadiyadda Somaliland dalalka Midowga Yurub” Phil
Batson
London (Jam)- Phil Batson oo ka mid ahaa marti sharaftii lagu
soo casuumay xafladi xuska 18ka May ee East London ahna u qaabilsanaha arrimaha
debedda dowladda Ingiriiska ee Geeska Afrika ayaa waxa uu ka soo jeediyay
halkaas qudbad dheer oo uu ku muujiyay mowqifka dowladda Ingiriiska ee ku
wajahan Somaliland.
Mr Phil Batson waxa uu ugu horeyntii ka waramay xidhiidhka fiican ee uu la
leeyahay dalka Somaliland, isagoo sheegay in uu sannad iyo badhkii ugu danbeeyay
laba jeer booqday Jamhuuriyadda Somaliland. Waxaanu xusay ka dib markii uu
dhagaystay warbixintii Dr. C/llaahi Guuleed ee ku wajahnayd sida dowladda
Ingiriisku uga sii jeedo arrimaha Somaliland, halka xukuumadda Talyaanigu uga
hanweyn tahay arrimaha Soomaaliya. Mr Batson waxa uu caddeeyay in cabashooyinkan
dowladda Ingiriisku ka warqabto isla markaana uu gaadhsiin doono wasaarada
arrimaha debedda ee boqortooyada Ingiriiska (White Hall). Isagoo arrinataas ka
hadlayana waxa uu yidhi “White Hallka dhexdiisa ayaa lagaga hadlaa warbixinada
aan meelahan oo kale ka gudbiyo. Aniguna waxaan ahay masuulka u qaabilsan
in aan uga qaybgalo shirarka lagaga hadlayo arrimaha Somaliland iyo Soomaaliya,
waxaanan had iyo jeer u soo bandhigaa in la tixgaliyo waxayaabaha u qabsoomay
Somaliland iyo kuwa loo baahan yahay in wax lagala qabtaba”. Intaas waxa uu ku
daray in waddamo ka tirsan Midowga Yurub (EU) qaarkood aanay hayn qaddiyada
dhabta ah iyo taariikhda runta ah ee Somaliland, isagoo tusaale u soo qaatay
shirkii ugu danbeeyay ee lagaga hadlayay arrimaha Soomaalida ee Brussels
(Belgium), kaasi oo dhacay bishan May dhexdeedii, waxaanu intaas ku ladhay in
dalal ka mid ah Midowga Yurub aanay aaminsanayn qaddiyada Somaliland sababtoo ah
buu yidhi wax sidaas ah kama oga arrimaha Somaliland.
Mr Batson waxa uu carrabka ku adkeeyay sida loogu baahan yahay in loogu
ololleeyo ka dhaadhicinta qaddiyada Somaliland, gaar ahaan waddamada Midowga
Yurubta dhexdooda, ururka IGAD iyo guud ahaanba Midowga Afrika.
Ugu danbeyntii waxa uu hadalkiisa ku soo gunaanaday in dowladda Ingiriisku og
tahay waxyaabaha faraha badan ee ay dowladda iyo dadka reer Somaliland qabsadeen
balse ay adag tahay in ay wax sidaas ah ka yidhaahdaan inta dowladdo Midowga
Yurub ka tirsani ka dhago xidhan yihiin xaqiiqada iyo taariikhda dhabta ah ee
Somaliland.
Haddaba waxa haboon in si wada jir ah loogu hawlgalo ka dhaadhicinta qadiyadda
Somaliland, gaar ahaan xukuumadda Somaliland iyo jaalliyadaha debeddu waa in ay
iska kaashadaan ololahan la rabo in lagaga midhi dhaliyo qaddiyadda Somaliland,
taasi oo horseedi doonta aqoonsi caalami ah oo ay hesho Jamhuuriyadda
Somaliland.
Khadar Xasan Cali
Jamhuuriya London
Emaila: jamhuuriya@hotmail.com
M
