PRESS RELEASE  - July  2001    (URUR CUSUB)  

 Urur cusub oo lagaga dhawaaqay magaaladan London Magaciisana la yidhaah Somaliland Democracy Watch Organisation (SDWO)  Ururka Ilaalinta dimoqraadiyada  Somaliland.      Marka hore ururkani maah urur siyaasi ah ama u xaglin doona dhinac.   Waa urur la abuuray ka dib markii daraasad dheer laga sameeyay baahiyaha kala duwan ee dalka ka jirta  xag shacbi iyo xag maamulba marka la eego xaga dimoqraadiyada.

 Ujeedooyinka loo aasaasay waxa ka mid ah in umaddeena la dareensiiyo waxa ay tahay dimoqraadiyadu iyo habka loo adeegsadaba  iyadii oo aan meel ku dhac lugu samayneeyn diinteena muqadiska ah.  Waxyaabaha ugu waaweeyn ee uu ururkani rabo in uu wax ka qabto waxa ka mid ah sidii loo dareensiin lahaa  loona tusi lahaa shacbiga wax aay wadanka xaq ugu leeyahiin iyo wax uu wadanku xaq ugu leeyahay taasi oo lugu gaadhi  karo wacyi gelin balaadhan.  In la baro lana  gaadhsiiyo shacbiga ku dhaqanka tasuurka dalka u yaal iyo ka gilgilashada haddii aay dhacdo in cid ka tirsan shacbiga ama dowladu  ku xadgudubto qodob ka mid ah qodobada tastuurka,  iyadii oo wacyi gelin iyo daraasadaba laga siin doono sidii iyo habkii aay u soo bandhigi lahaayeen wixii dareen ah ee aay qabaan iyadoo  waafaqsan tastuurka dalka iyo habka dimoqraadiyadaba.   

 Waa in la dareensiiyo umada in tastuurku yahay  hagaha koowaad ee kala haga  dhamaan laamaha dawlada, shacbiga iyo ururada madaxa banaanba, ku xadgudubkiisuna waa reeban yahay, hase yeeshee waxa dhacda in marar badan ay xukuumadu si badheedh ah ugu xad gudbto iyo shacbiga oo iygun had iyo jeer ku xad gudba, tan shacbiga oo aad odhan karto ma badana inta si badheedh ah ugu xadgudubta tastuurka  ee intooda badan waxay ka tahay aqoon, waana waxyaabaha ururkani ahmiyada gaarka ah  saarayo.

 Ujeedooyinka kale ee loo aasaasay waxa ka mid ah in uu ururkani u ololeeyo sidii Somaliland ictiraaf buuxa luugu heli lahaa, xidhiidho is dabo joog ahna la sameeyo dhamaan dawladah iyo haayadaha qaabilsan arimaha  Somaliland tani oo uu urku durba jawaabo ka helay xidhiidho kala duwan oo uu sameeyay.

 Ururkan SDWO wuxuu si toos ah ugu ololeeyn doonaa sidii afti buuxda looga qaadi lahaa shacbiga reer Somaliland iyadii oo la marayo sharicyada aduunka u yaal, tani oo noqotay waxyaabaha ugu weeyn ee caqabada ku noqotay aqoonsiaga Somaliland aduunkuna ingu xidhay.

 Ururukan SDWO waxa ka reeban si toos ahna uu uga soo horjeeda wax alla wixii khalkhal iyo deganaansho la,aan ku keeni kara jirtitaanka, sumcada iyo nabad gelyada Somaliland,  waxa kale oo uu ka soo horjeeda qabyaalada iyo wixii la hal maala isagoo si toos ahna u taageersan hanaanka xisbiyo badan oo siyaasi ah.  Ururku wuxuu aaminsan yahay saxaafada xorta ah iyo xoriytul qaawlka in la sii balaadhiyo.  Si uu ururku haawlahiisa u fusho wuxuu xidhiidho is daba joog ah iyo wada shaqaynba la yeelan doonaa ururada  caalamiga ah ee ku haawlan hirgelinta dimoqraadiyada iyo xoriyatul qaawlka.

 Ujeedooyika loo aasaasay urukan SDWO aad ayay u badan yihiin waxaanad ku arki doontaan tastuurkiisa.

 Ururkan waxa xubin ka noqon kara qof kaste oo aaminsan Jiritaanka Somaliland iyo sharciyada u yaal Urukan Somaliland Democracy Watch Organisation.

 Ururkani waxa uu leeyahay Tastuur iyo nidaam, dhowaana si toosa ayaa loo faafin doonaa.  Wuxuuna ururkani dhowaan yeelan doonaa World Wide Wabe Page iyo Emailba.

    Allaa Mahad leh:   Gudoomiyaha SDWO:  Mr Guled Cabdi Sheekhaash.