Qaadka oo dalka Sweden ka taagan heerka Xashiishada oo kale

SDWO - Finland  22nd August 2002- Mar aan dhowaan socdaal gaaban ku tegay dalka sweden ayaa waxa aad iiga yaabisay heerka uu qaadku ka marayo ama uu ka taagan yahay dalkaasi.

Qaadka ayaa waxa aad odhan kartaa waxa uu u dhigmaa ama uu marayaa heerka daraaga khatarta ah oo kale sida xashiishada.  Hadana iyadii oo ay sidaas tahay ayaa hadana waxa suurta gal ah in uu qaadku yimaado maalin walba, hase yeeshee iibkiisu uu adag yahay aadna looga baqo in lagugu qabto.

Waxa jirta in booliska dalka swedena uu aad ugu kuur galo sidii loo qaqaban lahaa dadka jaadka ka ganacsada ama cunayaba, waxaanu imika booliska dalkaasi bilaabay olole balaadhan oo somalida lagu dabo gelayo si qaadka loo xayiro, waxa la ii sheegay in dhowaan boolisku uu qabqabtay dad badan ka dib markii kamaradaha fiidyoowga lagu dul rakibay makhayda somalida oo daayr weeyn oo lagu qayli jiray ama qaadka lagula kala wareegi jiray leh, ka dibna markii mudo filmkaas la duubayey maalintii danbe iyagoo iska fadhfadhiya oo la iska shaahaynayo oo xataa aan qaadba la cunaynin ayaa boolis badani soo weraray goobtaas dad badan oo kamaradaasi qabatayna halkaas lagu qabqabtay.

Ilaa hada booliku isagoo baabuur wata ayuu saacad walba makhaayadaas car park geega uu soo gelayaa, oo xataa aroor anagoo halkaas ku shaahaynayna ayuu soo dhexgalay boolisku deedna intay baabuurkii na ag joojiyeen ayay afkayaga eegayeen in ay cidina afka waxa ku hayso.

Sidaas darteed qaadku wuxuu noqday mid baabuur uu la wareego oo aanad goob gaara ka heli karin, mararka qaarkoodan aad u safrayso ilaa nususaace. Inkastoo hada baabuurta ku dul iibkooda laga baqo,  oo laga baqayo in qof somali ahi u soo sheego booliska sida horey u dhacday deedna baabuurkaas la daba galo deedna la qabto.

Maalintii iila yaabka badnayd waxa ay ahayd markii ay ii suurto gashay in aan raaco niman dhalinyaro ah oo qaad raadinayay,  ka dibna meel walba waan ka weeynay qaadba.  Mudo yar ka dib ayaa mobile number nala siiyay oo la yiri ninkaas baa hayee la hadla, mucjiso waxa ay ka dhacday markii aan numberkii dirnay ee uu ninkii noo sheegay in uu qaadka ku hayo buur dheer oo kayn jiqi ku dhextaalo oo doogii dhulka ka baxay iyo dhirtii is gaadheen, oo  u dhow xaafad ka mid ah xaafadaha somalidu aadka u degto, ka dib markii aan halkii soo gaadhnay ayaan buurtii fuulnay se wax adkatay in aan helo halka ay kayntaas jiqda ah uu kaga dhex jiro, mudo yar ka dib waanu halnay halkaas oo aanu ugu tagnay dad badan oo sidii mafrishka halkaas ku qayilaya oo kayntaas dhexfadhiya oo xataa kookahoodiina haysta.

Qiimaha qaadka lagu iibsado ayaa ah mid aad uga sareeya qiimaha London oo Mijintu waxa ay ka taagnayd wakhtigaas aan ku sugnaa 20 Doolar, iyadoo weliba inta badan aan qaadku ahayn mid cusub.

Dalkan Finland ayaa isagu ka yara duwan sidaas oo aan cabsi sidaas u badan ka jiran oo maalin walba lagu qayilaa inkastoo qaadka Finland lagu cunaa mararka qaarkood uu yahay mid baarixi ah oo yaaley 3 - 4 cisho, hase yeeshee sida Sweden looma baqo marka baabuurta lagu sito ee aad guriga ku sii socotid.

Guled Cabdi SDWO - Finland