Xukuumada waxaan kula talinaynaa in ay aqoonsato qodobka 43aad ee dastuurka ee xaquuqda muwaadinka xoriyada laga qaaday. 

(Somaliland Democracy Watch  - SDWO – London) Press Release 16th July 2003:  Maanta Somaliland waxa ay maraysaa meel aad loogu farxo oo indhaha caalamka oo dhan soo jiidatay sida dimoqraadiyada ah ee ay  labadii doorasho  iyo codayntii dastuurkuba uga dhaceen dalka, inkastoo cabashooyin badani jireen hadana waa wax Illaahay loogu mahadnaqaa. 

Hadaba waxa haboon in laga digtoonado xukuumada Somaliland na aan xasuusinaynaa in sidaas aan aduunka u sheegayno ee dimoqraadiyada ah aan dalka gudahiisana kaga dhaqano, sida xaquuqda muwaadinka oo dhacda in inta badan aad moodo in meel la iska dhigay ama dastuurka ay ugu jirto sawir ahaan ee aan xukuumadu haba yaraatee qodobkaas tixgelinin, in badana dhacda in si badheedh ah xukuumadu ugu xadgudubto xuquuqda muwaadinka. 

Dastuurka Somaliland ayaa dhigaya qodobkiisa 43 aad ee xuquuqda qofka xoriyada laga qaaday, xubintiisa 2 aad oo odhanaysa (Qofka xorriyadda looga qaaday fal-dembiyeed lagu eedeeyey awgeed, waxa uu xaq u leeyahay in lagu horgeeyo Maxkamad 48 (sideed iyo afartan) saacadood; laga bilaabo marka la qabtay).  Hadaba waxa isweydiin leh qodobkan maxaa dastuurka loogu daray hadii aan lagu dhaqmayn. 

Hadii aan tusaale u soo qaadano waxa jirta dad badan oo mudo gaaban iyo mudo dheerba xidhnaada iyadii oo aan maxkamad la horgeyn.  Sida hada tii ugu danbaysay ee dhalinyaradii  loo xidh-xidhay rabshadii galbeedka Hargeysa ka dhacday 19ka May  ilaa hadana  intooda badani ay weli xidhanyahiin iyadii oo aan wax maxkamada la horgeyn,  SDWO marwalba wuu ka soo horjeedaa cid alla cidii nabadgelyada iyo hurmarka dalka khalkhal geninaysa isla markaasna  waan ka soo horjeednaa in lagu xadgudbo xaquuqda muwaadinka iyo dastuurkii loo codeeyayba.   Waxa  xukuumada ku waajiba in si degdega nimankaas dhalinyarada ah ee mudada aan  dastuurku ogeleyn xidhnaa maxkamad la horkeeno denbiga lagu eedeeynayaana noqdo laba mid uun,   mid ku cadaada deedna si sharciya loo xukumo ama noqda mid aan ku cadaan oo xoriyadoodii si degdeg ah loogu soo celiyo.  Labadaas qodob wixii dhaafsiisani waa xadgudb badheedha ah kana soo horjeeda dastuurka Somaliland iyo xaquuqal iinsaankaba.  

Xukuumada waxaan xasuusinaynaa in ay u dhisantahay Ilaalinta Dastuurka dalka ku dhaqankiisna hirgeliso iyada lafteeduna iskaga biloowdo ku dhaqankiisa.  Dastuurka sidii loogu codeeyay waa in loogu wada dhaqmaa ee aan qodobadiisa badhna la qaadan badhna laga tegin. Dastuurku waa hagaha u dhaxeeya Xukuumada iyo shacbiga, la,aantiisna bulsho waxba uma hagaagaan.

Guled Cabdi – Gudoomiyaha ururka SDWO

Mukhtar Axmed – Gudoomiye ku xigeenka SDWO

Axmed Maxmed – Afhayeenka SDWO 

Long Live Somaliland